GIULIANA PINO
Ccu pìcu d'a mènti, a rìzza di l'àrma
e u còri a - ffàrisi a lintìcchiu e - ccèlu,
scavànnu nna vintrèra di la tèrra,
piscànnu nna curàta di lu màri:
pàtri di famìglia, picciòtti... e ncògnitu... càrusi,
ncupunàti da nòtti, v'affànnanu lu pàni.
Lassànnu n'anzìja e - ccardacìja squadànti
muglìeri ccu-nnutrìchi, sòru e - mmàtri
ca, a mpruvvìsi timpèsti e - ttimpuràli,
laddimùra jè sintùri di ddisgràzzija...
e si l'ècu di lu vèntu xùxxa scàsciu
cùrrinu a Màrcè, a Bbatì, o pùntìli... prigànnu:
Signùri nni l'at'a - ssarbàri:
- di lu sbùmmu di l'antimòniju;
- di la cadùta diii bbalatuna;
- di li spurijàti di lu cèlu;
- di li malipàssi di la tèrra;
- di li ngarziddrùna di lu mari...
Sàni lèstu facìtiti turnàri
ppi sti nnuccènti ca cci pari fèsta,
ppi nnàntri ca sènza um - putèmu stàri.
Sùnnu lu nòstru pàni, la nòstra àrma,
la nòstra ggiòja, la nòstra sistènza...
Tùttu sùnnu ppi nnàntri...un tu scurdàri!
Stàcci vicìnu, nu - ll'abbannunàri!
Nàntri sèmu ccà c'aggliuttèmu fèli
cc'azzìddri di mòrti a va e - bbèni.
Stànchi sèmu di vilètti nìuri;
fàllu ppi sti crijatùra c'avèmu ncòddru
si um - mò vidè ca ppi ìddri t'amm'a pprigàri!"
Spirànza e - ffidi cunòrtanu nzilènziju...
ma sìddru ncasciàti si vìdinu purtàri,
un grìdu gginiràli, fòrti, strazzijànti,
cc'a stèssa pèna tutti smòvi a -cchiànciri.
E - ttra stinnicchiùna, nzùrti, gùtti e - bbràmi
abbrazzànnu forti forti lu tabbutu... chiamanu:
Vitu, Vitùzzu, Vitinèddru;
Vicènzu, Vicinzìnu, Vicinzinèddru;
Michéli, Michilìnu, Michilinèddru;
Ancìlu, Nccilìnu, Ancilinèddru...
e a litànija...l'àntri ca lassàru a pèddri
nfùnnu di li gallarìji e di l'abbìssi...
Midèsima sòrti... spurtunàta e amàra..
hànnu pirrijàtura e-mmarinàra.