poesia di Ignazio Buttitta /voce Gilberto Idonea
BUTTITTA IGNAZIO
L’EMIGRANTI RIPARTONO
"Ottu jorna di festa e ora si nni vannu
ca' non è chiù Natali e mancu Capudannu.
Ritornanu nta' nivi unni c’è negghia e scuru,
e c’è un patruni straniu e c’è un travagghiu duru.
Unni sunnu chiamati pi' ncìuria, terroni,
e l’òmini da Sicilia non semu genti boni.
E partinu cu' suli nto' trenu senza suli,
cu' cori chi ci chianci e un gruppu 'nni li guli.
Nto' trenu senza suli, cu' cori chi ci chianci.
Addiu bedda Sicilia, oh terra mia d’aranci!
Oh terra mia d'aranci, d’aranci e di canzuni;
u' latti mi lu dasti ma pani un mi nni duni.
Partinu a la vintura; i trenu sunnu chini;
i manu chi salutanu fora di finistrini.
Salutanu l’amici, i matri e i picciriddi;
e i stazioni o scuru e u' celu senza stiddi.
Pari ca fussi a guerra e iddi si u' surdati
ca vannu a fari a' guerra chi zaini affardillati.
Surdati disarmati e senza distintivi,
ca' partinu e non sannu si tornanu fra i vivi.
Pi' armi hannu i' vrazza e hannu i' caddi e' manu; a' patria non hannu e né travagghiu e pani.
I' vrazzi e i' caddi hannu e i' carini forti
pi' fari i' casi a l’àutri, palazzi e aeroporti.
Pi' costruiri scoli, fabbriche e arsenali,
autostradi, ponti , grattaceli e spitali.
Pi l’autri, i terroni, a carni siciliana,
'nto furnu du' travagghiu sdivaca sangu e scana.
E cu l’occhi di figghi vidinu i' luntanu
a' Sicilia mpiccata e si mùzzicanu i manu".