Poesia di Girolamo La Marca (voce Nicolò La Perna)
LA MARCA GIROLAMO
IRA, VOTA E FIRRIA
Ci su gnorna
ca ti sienti ntrunatu,
e gira vota e firria
tu piensi
a chiddru ca ni la to vita
e’ capitatu.
Li jorna passanu,
passanu li misi e ......
ma nuatri no,
nuatri nun canciammu.
E a li voti, di sira,
niesciu sulu,
lu cappieddru niuro in testa,
mi ni vaju unna c’e’ scuru,
un pisci senza resca.
ed ogni tantu,
bestia ca sugnu, ogni tantu
m’allapazzu di grappa..
pi mia c’aju lu zuccaru
e’ cuomu darimilli
cu la zappa.
E certi voti
mi sientu stranu
com’un bunmulu spizucatu...
nun ci voli viviri
nuddru,
pi nun rumpirisi lu palatu.
Allura jettu paroli niuri,
niuri comu la pici,
e c’iaddumannu a Cristu:
‘‘ma iu chi bestia sugnu,
mi lu vo diri tu chi mali fici?’’
Ma gira, vota e firria
iddru nun mi dici nenti
o, forsi, sugnu iu lu surdu
c’ascuta malamenti:
e allura chi c’e’ di fari?
nenti
mi curcu e gniettu un lamentu,
la testa ca j’e’ na tuortula,
ed iu
na cumedia senza chiu ‘ vientu.